ಪುಟ್ಟ ಹುಡುಗ ಚೌಕಿಮನೆಯಲ್ಲಿ ಯಕ್ಷಗಾನದ ವೇಷ ಕಟ್ಟುತ್ತಿದ್ದಾನೆ. ಅವನದು ಆ ದಿನ ಸ್ತ್ರೀ ಪಾತ್ರ. ಎದೆಗೆ ಕಂಚುಕ ಬಿಗಿದು ರವಿಕೆ ಹಾಕಿಯಾಗಿದೆ. ಕಪ್ಪು ಪೈಜಾಮ ತೊಟ್ಟು ಅದರ ಮೇಲೊಂದು ದಪ್ಪದ ಬಟ್ಟೆಯನ್ನು ನಡುವಿಗೆ ಸುತ್ತಲಾಗಿದೆ. ಸ್ತ್ರೀ ವೇಷದ ಕಿರೀಟ ತಲೆಯಲ್ಲಿದೆ. ಜಡೆ ಬೆನ್ನ ಹಿಂದೆ ತೂಗಾಡುತ್ತಿದೆ. ಸೀರೆಯೊಂದನ್ನು ನೆರಿಗೆಯಿಟ್ಟು ಸುತ್ತಬೇಕಷ್ಟೇ. ಯಾರೋ ಹೇಳಿದರು, " ಹೊರಗೆ ಅತಿಥಿಗಳು ಬಂದಿರುವರಂತೆ. ಒಮ್ಮೆ ಎಲ್ಲರೂ ಬಂದು ಮಾತಾಡಿಸಬೇಕಂತೆ."
ಎಲ್ಲರೊಂದಿಗೆ ಇವನೂ ತಕ್ಷಣ ಎದ್ದು ಕುಣಿಯುತ್ತಾ ಹೊರಟ. ವೇಷ ಕಟ್ಟುತ್ತಿದ್ದವ ಕರೆದು ಹೇಳಿದ,"ಏಯ್, ಎದೆಗೊಂದು ಮೇಲುವಸ್ತ್ರ ಹೊದೆದು ಹೋಗು" ಹುಡುಗನಿಗಾಗ ಎಚ್ಚರವಾಯ್ತು, " ಓಹೋ, ನಾನೀಗ ಹುಡುಗಿ" ಎಂದು. ತನ್ನ ಎದೆಯನ್ನೊಮ್ಮೆ ನೋಡಿ, ಮೇಲುವಸ್ತ್ರ ಹೊದೆದು ಹೊರಗೆ ಹೋದ!
No comments:
Post a Comment